“Ura me tri harqe” e solli në Tetovë piktorin e mirënjohur, profesor Gazmend Lekën

Në kuadër të manifestimit tradicional kulturor ”Ura me tri harqe”, përveç aktiviteteve të kthyera edhe ato në tradicionale, si ekspozita e arteve pamore, koncerti, shfaqjet teatrale dhe filmat e metrazhit të shkurtër, sivjet u zhvillua edhe një aktivitet tjetër i veçantë dhe ky ishte bashkëbisedimi me profesorin dhe piktorin e mirënjohur Gazmend Leka nga Universiteti i Arteve të Tiranës që u zhvillua në ambientet e Europe House në Tetovë dhe u moderua nga prodekania për shkencë e Fakultetit të Arteve të Universitetit të Tetovës, Prof. Ord. Nora Halimi.

Tema e diskutimit ishte: Baladat dhe legjendat shqiptare “Përqasjet me mendimin mitik të popujve të tjerë”, një temë kjo që nuk kishte si t’i shkonte më për shtat këtij manifestimi që ka prapashtesën ”kombëtar”.

Në këtë aktivitet mori pjesë edhe Rektori i Universitetit të Tetovës Prof. Dr. Jusuf Zejneli, Prorektori për Bashkëpunim Ndërkombëtar, Prof. Dr.Salajdin Salihu, Prorektori i Universitetit të Tiranës Prof. Arian Paço, dekani i Fakultetit të Arteve Prof. Ord. Senad Abduli, profesorë dhe studentë nga të tre institucionet pjesëmarrëse, si dhe dashamirë të artit.

Gazmend Leka është një nga figurat më të shquara të artit bashkëkohor shqiptar, i njohur për kontributin e tij te jashtëzakonshëm si piktor, pedagog dhe regjisor artistik.

Krijimtaria e Gazmend Lekës është një shembull i rrallë ku sasia e krijimit dhe cilësia e lartë artistike e veprave të tij bashkëjetojnë në mënyrë kaq harmonike, duke dëshmuar përkushtimin e tij të palëkundur ndaj artit dhe ndaj thirrjes së të qenit piktor.

Me shumë ekspozita personale dhe në grup të realizuara në Shqipëri dhe jashtë saj, me çmime dhe vlerësime të shumta, me shumë vepra pjesë të koleksioneve kombëtare dhe ndërkombëtare, nder e kënaqësi ta kishim të ftuar në Universitetin e Tetovës.

Profesori foli për një pjesë te krijimtarisë së tij që lidhet me ilustrimet e trashëgimisë folklorike shqiptare, të trajtuar me një gjuhë vizuale të veçantë, duke sjellë në jetë baladat dhe legjendat shqiptare të cilat pasqyrojnë personazhe mitologjike dhe ngjarje historike të rëndësishme dhe këtë diskutim e ndërlidhi edhe me mendimin mitik të popujve të tjerë.

Pjesëmarrja e Gazmend Lekës në këtë manifestim ishte një burim frymëzimi për të gjithë ne. Ai na kujtoi se arti nuk është vetëm një shprehje estetike, por edhe një formë e fuqishme e komunikimit dhe e ndërtimit të urave jo vetëm mes njerëzve, por edhe mes kohërave.