Skandal i madh në negociata: Delegatët rusë u grindën për një karrige para amerikanëve

Gazeta Agentstvo, duke cituar burime, raportoi një incident të çuditshëm që ndodhi gjatë bisedimeve midis delegacioneve ruse dhe amerikane në Arabinë Saudite më 18 shkurt.

Siç rezulton, Vladimir Putini ia besoi negociatat me SHBA-të dy ekipeve rivale.

Fillimisht, pala ruse supozohej të përfaqësohej vetëm nga ministri i Jashtëm, Sergei Lavrov dhe ndihmësi i Putinit, Ushakov. Më vonë, delegacionit iu shtua i dërguari special i Putinit, Dmitriev, por Lavrov nuk u informua.

Pikërisht ky fakt ka bërë që Lavrov të nxehej së tepërmi me situatën dhe të mos lejonte Dmitrievin të kishte një karrige të tijën.

Ministri i Jashtëm rus e largoi karrigen nga tavolina, duke thënë: “Nëse dëshiron të marrë pjesë, le të ma thotë personalisht Vladimir Vladimirovich (referuar Putinit, red.)”.

Pas kësaj, Dmitriev doli nga dhoma për të folur me gazetarët në korridor. E gjithë kjo u shpalos para zyrtarëve amerikanë. Këta të fundit raportohet nga gazeta se kanë mbetur absolutisht të shastisur dhe të habitur nga e gjithë situata e krijuar me delegacionin rus.

“Të gjithë shkojnë tek Putini një për një dhe ai i thotë secilit prej tyre diçka të ndryshme. Kjo është një pjesë e arsyes pse askush nuk mund të formulojë qartë kërkesat e Rusisë në negociata”, tregoi ndër të tjera burimi i Agentstvo për gjithë tablonë e çështjes.

Një reagim mbi këtë ende mungon nga Kremlini. Ndërsa koment nuk ka pasur as nga pala amerikane.