Shoqata “Tradita” e realizoi aksionin për mbjelljen e fidanëve të reja në malin Sharr

Shoqata për kulturë dhe art “Tradita”-Tetovë, në kuadër të fazës së dytë të projektit” “Mbrojtja e biodiversitetit të florës dhe të faunës në malin Sharr – imperativ shoqëror”, e ka përmbyllur me sukses aksionin për mbjelljen e fidanëve të reja në territorin e Parkut kombëtar “Mali Sharr”. Aksioni në fjalë në kuadër të të cilit u mbollën 500 fidanë të reja, synon pyllëzimin e pyjeve; mbrojtjen nga erozioni; pastrimin e ajrit; rregullimin e regjimit ujor; përmirësimin e mikroklimës; pasurimin e biodiversitetit dhe krijimin e habitatit natyror për botën shtazore.
Aksione të kësaj natyre duhet të zhvillohen më shpesh sepse ndryshimet e thella të biodiversiteit në nivel global kanë pasoja për ekosistemin. Garantimi i biodivesitetit është një detyrë që na përket të gjithëve dhe ndikon drejtpërdrejtë në cilësinë e jetës së secilit prej nesh.
Dihet botërisht se biodiversiteti ka kontribuar në shumë mënyra në zhvillimin e kulturës njerëzore dhe shoqëria si e tillë ka pasur rol të dukshëm në formimin e diversitetit gjenetik të specieve dhe nivelit ekologjik. Projekti “Mbrojtja e biodiversitetit të florës dhe të faunës në malin Sharr – imperativ shoqëror” realizohet nga Shoqata “Tradita” në kuadër të projektit “Përdorimi i qëndrueshëm i burimeve natyrore (Korab-Koritnik-mali Sharr dhe Alpet Shqiptare), i mbështetur nga CNVP- PONT.