Rrugës nga Sofja për në Tiranë! Presidenti Begaj takon Ahmetin dhe Taravarin!

Presidenti i Republikës së Shqipërisë, Bajram Begaj, pas kthimit nga Sofja ku ka marrë pjesë në takimin e nivelit të lartë “Process Balkans Forum III”, që bashkëorganizohet nga Presidenti i Bullgarisë Rumen Radev dhe Mbreti i Jordanisë Abdullah II, në Shkup është takuar me liderin e BDI-së, Ali Ahmetin, por edhe me liderin e krahut të ASH-së, Arben Taravarin.

“Bashkë me Sekretarin e Përgjithshëm të ASH-së Blerant Ramadani, kisha një takim vëllezëror me presidentin Bajram Begaj!” – ka shkruar Taravari në Facebook.

Ndryshe, takimi I dy krerëve të partive politike shqiptare Ahmeti dhe Taravari, me Presidentin Begaj, ndodhi në të njëjtën kohë dhe nuk ka munguar as edhe përshëndetja midis tyre.

Edhe pse bëhet fjalë për një takim protokollar dhe të rastit, takimi Ahmeti-Taravari me Presidentin Begaj, ndodh në kohën kur në opinion gjithnjë e më shumë po flitet për “çarje” të raporteve brenda koalicionit VLEN dhe për ripozicionime partiake brenda këtij koalicioni në prag të zgjedhjeve lokale.