Rasti i Vedatit: Kërkohet heqja licencës së doktorit! Hetimi i Prokurorisë në pritje të raportit të autopsisë

Për rastin e vdekjes së pacientit Vedat Ademi në Spitalin e Kumanovës, Ministria e Shëndetësisë ka bërë shkresë zyrtare për heqjen e licencës së doktorit Zoran Gjeorgjievski dhe stafit medicinal, të cilët kanë qenë në turnin e 17 Marsit, ku dyshohet që 32 vjeçi ndërroi jetë pas dhënies së terapisë së gabuar. Ministri Taravari në vizitë të Spitalit të qytetit tha se edhe raportin e komisionit të posaçëm të ngritur përmes Inspektoratit Shtetëror Sanitar Shëndetësor e kanë dorëzuar në Prokurorinë e Kumanovës.

“Gjetjet i kemi kompletuar edhe prej Mjekësisë Ligjore. Veç se ka propozuar Ministria e Shëndetësisë deri te Oda e mjekëve për të ja marr licencën mjekut që ka pas këtë rast edhe personelit tjetër mjekësor dhe lënda është dorëzuar në Prokurori. Kemi bërë çmos, gjithçka që është dashur është bërë prej te shkarkimi i drejtori që ishet shkaku të ndryshohet”, tha Arben Taravari.

Por, drejtori i sapo emëruar i këtij spitali nuk e ka suspenduar nga puna doktorin Zoran Gjeorgjievski. Ai thotë se pret çfarë do të bëhet me hetimin. Sasho Stoshkovski, as për arsye morale nuk e ka bërë këtë, ndonëse është hapur procedurë hetimore për doktorin dhe infermieren që dyshohet se i kanë dhënë infuzion me analgjetik, pa e shikuar librezën e pacientit që shkruan se ka qenë alergjik nga analgjetikët.

“Shërbimet profesionale janë duke kryer punën, komisioni gjithashtu, kur të vijë raporti përfundimtar do të ju informojmë. A është drejtori Zoran Gjeorgjievski akoma në punë? Nuk mund të komentoj asgjë për të mos e penguar hetimin, janë shërbimet që punojnë. Ju si drejtor i këtij institucioni, a duhet për arsye morale ai të paktën të suspendohet derisa udhëhiqet procedura? Unë jam 10 ditë këtu jam njohur me rastin dhe pres raportin e komisioneve e do të dalim në opinion”, deklaroi Sasho Stoshkovski.Nga Prokuroria e Kumanovës thonë se ende janë në pritje të raportit të autopsisë nga Mjekësia Ligjore.

Ata për TV21 thonë se hetimin janë duke e bërë edhe në dosjen mjekësore të pacientit të ndjerë për të parë gjendjen e tij shëndetësorë ndër vite. Ndërkaq, nëse vërtetohet se gabimi mjekësor i mori jetën 32 vjeçarit Vedat Ademi, doktori dhe stafi i turnit do të akuzohen për veprën penale: Vepër e rëndë kundër shëndetit të njerëzve, sipas nenit 217, ku është paraparë burg deri në 10 vite. Në komunikim me doktorin, ai thotë se ia lë në dorë organeve të hetuesisë. Mësojmë se ai ka marr 1 javë pushim nga puna./TV21