Promovohen veprat e reja të studiueses së historisë së artit, Prof. Dr. Jëlldëz Asanit

Më 23 prill 2025, në ambientet e Universitetit të Tetovës u mbajt ceremonia promovuese e dy botimeve më të fundit të autores dhe studiueses së njohur në fushën e historisë së artit, Prof. Dr. Jëlldëz Asani. Veprat e promovuara, me titujt: “Nga perspektiva e Renesansës tek iluzioni optik i Manierizmit” dhe “Dritëhijet e Barokut dhe teatraliteti i Rokokosë”, janë kontribut i rëndësishëm në literaturën shqipe për artin figurativ perëndimor.
Përmes këtyre dy botimeve, autorja synon të ofrojë një material të strukturuar dhe analitik mbi zhvillimet estetike dhe stilistike në periudhat më të rëndësishme të artit evropian – nga Renesansa, Manierizmi dhe Baroku, deri te epoka e Rokokosë. Të ndërtuara mbi një qasje kronologjike dhe metodologjike, këto vepra shërbejnë si udhërrëfyes të qartë për studentët, studiuesit dhe të gjithë dashamirët e artit, duke lehtësuar kuptimin dhe vlerësimin e thelluar të konteksteve kulturore dhe artistike që kanë ndikuar në zhvillimin e artit perëndimor.
Një element dallues i këtyre botimeve është përfshirja e një koleksioni të pasur reproduksionesh artistike me cilësi të lartë, të cilat jo vetëm e pasurojnë vizualisht tekstin, por e ndihmojnë lexuesin në interpretimin më të plotë të veprave të autorëve të mëdhenj të këtyre periudhave. Çdo ilustrim është përzgjedhur me kujdes në funksion të theksimit të veçorive stilistike dhe ndikimeve estetike që i karakterizojnë këto epoka.
Ngjarja promovuese mblodhi përfaqësues të udhëheqësisë së Universitetit të Tetovës, profesorë universitarë, studiues të fushave të ndryshme, studentë, si dhe dashamirë të artit dhe kulturës. Në fjalën e tij përshëndetëse, dekani i Fakultetit të Arteve, Prof. Ord. Senad Abduli, e vlerësoi kontributin e çmuar të Prof. Dr. Jëlldëz Asanit në pasurimin e literaturës akademike në gjuhën shqipe, veçanërisht në një fushë për të cilën botime të tilla mungojnë në bibliotekat tona universitare. Ndërkohë, recensentët e veprave – Prof. Dr. Mixhait Pollozhani dhe Prof. Dr. Metin Izeti, theksuan vlerën shkencore dhe pedagogjike të këtyre botimeve, duke i cilësuar ato si burime të domosdoshme për ndërtimin e një qasjeje më të thelluar ndaj historisë së artit dhe për kultivimin e vetëdijes kulturore në shoqërinë shqiptare.