Një hotel dhe disa objekte gastronomike në Strugë nuk i plotësojnë kushtet e punës

Katër nga gjithsej shtatë objekte gastronomike në Strugë që janë kontrolluar deri më tani nuk i plotësojnë kushtet minimale teknike për punë. Midis tyre është një hotel. Kjo është konstatuar nga kontrollet e disa institucioneve kompetente shtetërore, konfirmojnë për Alsat nga Inspektorati i tregut në Strugë. Ndaj tyre janë shqiptuar gjoba nga 100 deri në 1000 euro. Nëse nuk i paguajnë brenda 8 ditëve, do të përfundojnë në gjykatë.

“Aktualisht, sipas Ligjit për veprimtari gastronomike, gjegjësisht Rregullores për plotësimin e kërkesave minimale teknike, janë marrë aktvendime me të cilat tregohet eliminimin e lëshimeve në afat prej 8 ditëve. Për shkeljen e konstatuar janë shqiptuar edhe gjoba, gjysma e të cilave duhet të paguhet brenda 8 ditëve. Nëse nuk i paguajnë, do të ngrihet padi në Gjykatën Themelore nga vetë gjykata në Strugë. Presim që shkeljet të eliminojnë vet gastronomët”, deklaroi Artim Roçi- udhëheqës i Inspektoratit të tregut, Strugë.

Edhe në Dibër, nga gjithsej dhjetë objekte të kontrolluara, pesë nuk i plotësojnë kushtet minimale teknike. Gjatë kësaj jave do të inspektohen kapacitetet gastronomike në Ohër. Nga hotelet në Strugë, ku kanë hyrë inspektorë dhe policë, thonë se është kontrolluar çdo gjë, që nga kushtet në sallat e dasmave e deri te posedimi i aparateve të zjarrit, hidrantëve, gjegjësisht i gjithë funksionimi i objektit.

“Unë besoj se nuk duhet assesi të hapen nëse nuk kanë kushte minimale teknike për punë. Nëse dikush mendon diçka të tillë, para së gjithash i rrezikon punëtorët, pastaj mysafirët dhe gjithë të tjerët. Shteti dhe inspektimet duhet të sigurohen që kjo të mos ndodhë, edhe nëse dikush dëshiron ta bëjë një gjë të tillë”, u shpreh Ana Jançeva- menaxhere hoteli në Strugë.

Këshilli lokal për parandalim ndër të tjera javën e kaluar vendosi edhe kontrollin e të gjitha sallave sportive në territorin e komunës, si dhe parqeve argëtuese në qytet.