Mickoski: Apasievi është larg nga ajo që prezantohet se është ai është kundër përmbaruesve, përveç kur blen prej tyre hapësirë afariste 3 herë më lirë

Kryetari i Qeverisë Hristijan Mickoski, në pjesëmarrjen e tij të sotme në emisionin “Pro ose kundër” në televizionin Alfa, i hodhi poshtë akuzat se ekziston ndonjë marrëveshje me prokurorin publik Ljupço Kocevski, duke theksuar se në kushte të një tragjedie të tillë në Koçani do të ishte amatoreske dhe e pamatur të vazhdonte procesi për shkarkimin e tij, ndërkohë që të injorohej i gjithë hetimi.

“Këtë sot e tha deputeti Apasiev nga foltorja e Kuvendit, ai këtë e prezantoi si merr/jep. Shikoni, të tilla skenarë dhe lloj lloj absurditete mund të përhapen, por puna është gjithmonë shumë më e thjeshtë nga sa duket. Askush prej nesh nuk thotë se është i kënaqur me punën e Ljupço Kocevski, por do të ishte amatoreske dhe e pamatur nëse në një rast të tillë, një tragjedi si kjo, të vazhdohej me procesin e shkarkimit. Çfarë mesazhi do të dërgonim atëherë? Që i injorojmë të gjitha, përfshirë hetimin, vetëm për të realizuar ndonjë qëllim tonin. Nuk besoj se kjo është politikisht e mençur”, tha Mickoski.

Në lidhje me akuzat nga Apasiev, kryeministri Mickoski theksoi se Apasiev është larg nga ajo që prezantohet, duke treguar se ai është kundër përmbaruesve para popullit, përveç kur blen prej tyre hapësirë afariste në qendër të Shkupit tre herë më lirë.

“Ajo që përmenda sot në Kuvend është vetëm vazhdim i të gjitha atyre fyerjeve dhe konstruksioneve që ky politikan i reflekton, më së shpeshti në rrjetet sociale ose nga foltorja e Kuvendit, ku gëzon imunitet. Vlerësoj se ky është vetëm fillimi, do të vijojnë edhe shumë gjëra të tjera, zbulime që tregojnë se ata janë larg nga ajo që përpiqen artificialisht të prezantojnë, jo vetëm ai, por edhe rrethi i tij.

Partia politike E Majta, në fund të nëntorit 2024, bleu një hapësirë afariste në qendër të Shkupit, për të cilën ai pranoi se është bodrum dhe përdhes, me sipërfaqe 420 metra katrorë, për çmim me TVSH prej 295.000 euro. Do të thoja ose është dhuratë për realizimin e ndonjë qëllimi, ose kontrata ka pjesë të dytë që ne nuk e shohim dhe për këtë arsye kërkova që organet ta hetojnë të gjithë këtë”, theksoi Mickoski dhe shpjegoi se një metër katror vlen të paktën tre herë më shumë sesa ata kanë paguar dhe sesa e vlerëson Qyteti i Shkupit.

“A nuk ishte E Majta kundër përmbaruesve? Por përmbaruesit nuk i pengojnë kur shesin prona të tilla. Përmbaruesi që ka të bëjë me këtë objekt është i njëjti me atë të Soravias, që do të shitet në ankand diku pas 20 prillit. Të dyja kanë të njëjtin institucion financiar që i bashkon – e kjo është Banka e Parë Investuese, bankë që funksionon në sistemin bankar maqedonas dhe është në pronësi të biznesmenëve bullgarë”, deklaroi kryeministri Mickoski.