Kyle Walker: Milani nuk refuzohet, ky është objektivi im tek Anglia

Kyle Walker u transferua te Milani nga Manchester City gjatë merkatos së janarit me formulën e huazimit me të drejtë blerjeje të përcaktuar në 5 milionë euro. Në ‘The Kyle Walker Podcast’, anglezi ka rrëfyer transferimin e tij në Itali:

“Në futboll, kur të jepen mundësi të tilla, duhet t’i shfrytëzosh. Dhe për mua, të përjetoja një kampionat të ndryshëm, një kulturë të ndryshme, të luaja për një klub si Milani… nuk mendoj se mund të refuzohet. Kur e di që një klub si Milani të dëshiron, ti do të shkosh dhe të përballesh me një sfidë të re. Mendoj se ka disa klube në botë të cilave nuk mund t’u thuash jo. Për mua, kishte ardhur momenti i duhur për t’u larguar. Dhe Milani ishte klubi i duhur. Mendova se duhej të shkoja dhe të provoja diçka ndryshe, sepse nuk dua të kem pendesa në fund të karrierës. Mund të eksploroja diçka ndryshe dhe të vija në një klub si ky. Mendoj se ishte zgjedhja e duhur për mua”.

LEXO EDHE:
VIDEO/ Muçi rigjen golin pas dy muajsh, sulmuesi tund rrjetën në Kupën e Turqisë
Cili do të jetë e ardhmja e tij? “Pasi thashë lamtumirë, Guardiola u ngrit dhe mbajti një fjalim vërtet të bukur, duke më falënderuar për gjithçka. Por nuk ka përfunduar. Jam te Milani në huazim. Duhet të marr parasysh faktin që mund të kthehem edhe te City. Natyrisht, palët duhet të arrijnë një marrëveshje në fund të sezonit, kapitulli nuk është mbyllur plotësisht, por do të shohim se çfarë do të ndodhë”.

Objektivi i tij me Anglinë: “Ishte një lehtësim i madh kur Thomas Tuchel (trajneri i Anglisë) më telefonoi dhe folëm. Kam biseduar me të edhe për kalimin te Milani dhe i thashë: ‘Dua të qëndroj në Evropë sepse dua të vazhdoj të përfaqësoj vendin tim dhe të arrij 100 paraqitje’. Dua vetëm të jem në gjendje të them se kam përfaqësuar vendin tim 100 herë”.