Keshishev: Nuk isha i vetëdijshëm për gjithë situatën, me shprehi isha i dëgjueshëm

I akuzuari Vllatko Keshishev në rastin e vrasjes së Vanjës dhe Pançes sot iu përgjigj pyetjeve të prokurorit publik që kishin në fokus komunikimin me të bashkëpandehurit, motivet e të pandehurit dhe vetëdijen për seriozitetin e situatës. Keshishev pranoi se ishte nën ndikimin e Ljupço Palevskit, por pretendon se nuk ishte plotësisht në dijeni të veprimeve të tij.

I pyetur nëse ishte e logjikshme, nëse nuk do të vrisnin dikë, të linin telefonin në Shkup që të mos zbuloheshin lëvizjet e tyre, ai u përgjigj se kishin Motorola dhe, siç tha ai, “askush nuk ka folur ndonjëherë për vrasje”.

I pyetur nëse kishte kuptim për të që pasi u kthyen të tjerët, nuk diskutoi asgjë dhe nuk e pyeti se çfarë ndodhi me trupin e personit, ai u përgjigj se nuk e dinte. “Nuk e di nëse është e logjikshme, por askush nuk foli. Kur arritëm në seli, bëra kafe dhe lëngje dhe më pas u përmend se ishte vrarë”, tha ai.

Në pyetjen se nuk ka pasur reagim nga ana e tij se ka ndodhur vrasja më 22 nëntor 2024 në Veles, ai është përgjigjur se nuk e ka raportuar askund sepse, siç tha ai, “në fillim kam qenë i hutuar, pastaj nuk kam mundur të largohem nga selia”.

Në pyetjen e prokurores se në celularin e tij Ljupço Palevski është memorizuar si “Cari”, përkatësisht nëse kjo do të thotë se dëgjon çdo urdhër nga Ljupço Palevski, Keshishev u përgjigj pozitivisht.

Sipas ekspertizës, pyeti prokurorja, ju jeni një person i shëndoshë, a do të thotë se me vetëdije dhe vullnetarisht i keni marrë të gjtiha vperimet? “Jo shumë me vetëdije, me shprehi kam qenë i dëgjueshëm sepse më tha të mos flas shumë, të heshtim të ulem anash, do të jem mënjanë”, tha ai.

Në pyetjet nëse janë fshirë komunikimet me Ljupço Palevskin dhe të akuzuarit tjerë, u përgjigj se nuk i ka fshirë ai sepse nuk ka ditur se si fshihen. I pyetur nëse ishte në dijeni se kishte marrë pjesë në një ngjarje ku duhet të zhduken të gjitha gjurmët, ai u përgjigj po. “Me vetëdije ose pa vetëdije nuk munda ta dorëzoja në rradhë të parë dhe ende nuk e kam të qartë se ç’farë ndodhi dhe si, nuk isha i vetëdijshëm për gjithë situatën”, theksoi Keshishev.

Ai tha se gjithçka që shihet në pamjet nga prokuroria është e vërtetë.

Pyetjeve rreth detajeve konkrete për vrasjen e Vanjës nuk iu përgjigj, duke thënë se nuk i ka parë.

Pas përfundimit të pyetjeve nga prokuroria, shqyrtimi vazhdoi me leximin e deklaratës së Keshishev nga gjyqtari Ivica Stefanovski, me qëllim që i pandehuri Ljupço Palevski, i cili paraprakisht ishte larguar nga gjykimi për shkak të dyshimeve për ndikim nga deklarata e Keshishevit, të njoftohet me deklaratën. Pastaj mbrojtja e të akuzuarve duhet të bëjë pyetje.

Keshishev, më parë tha se Pançen dhe Vanjën për herë të parë i ka parë pas postimeve në Fejsbuk për zhdukjen e tyre. Ai sot ka dëshmuar për grabitjen e tyre me ç’rast sipas përgjigjeve të tij për të njejtat kryesisht e ka pasur rolin e rojtarit.

Sipas njoftimit, pas marrjes në pyetje të Keshishevit, është paraparë të dëshmojnë babai i Vanjës, Aleksandar Gjorçevski dhe Ljupço Palevski.

Në aktakuzë thuhet se Ljupço Palevski, Bore Videvski, Velibor Manev, Vllatko Keshishov dhe Aleksandar Gjorçevski, së bashku kanë planifikuar rrëmbimin e 14-vjeçares Vanja me qëllim që të detyrojnë një anëtar të familjes së saj të ngushtë të japë para për shpërblim. Rrëmbimi i të dëmtuarit, Pançe Zhezovski, në Veles, sipas aktakuzës, ka qenë me qëllim që ta detyrojë t’ua japë automjetin e tij Citroen, në mënyrë që ta përdorin për ta rrëmbyer fëmijën në Shkup.

Vanja e mitur dhe Pançe nga Velesi, u raportuan të zhdukur më 27 dhe 24 nëntor, ndërsa më 3 dhjetor të vitit 2023 u gjetën të vdekur në afërsi të Shkupit dhe Velesit.