Ahmeti për koalicionin me Taravarin: BDI nuk është “gomë rezervë” (VIDEO)

Pas takimit me presidentin e Shqipërisë, Bajram Begaj, lideri i BDI-së, Ali Ahmeti, e mohoi kategorikisht çdo marrëveshje me Arben Taravarin, ministrin e Shëndetësisë dhe anëtar i koalicionit VLEN. Duke iu përgjigjur një pyetjeje nga gazetarët, Ahmeti deklaroi se BDI nuk merr pjesë në skenarë të koalicioneve të tjera dhe, siç tha ai, nuk përdoret si “gomë rezervë”.

Taravari më herët kishte deklaruar se VLEN është e konsoliduar, por ka disa mospajtime të caktuara.

Ahmeti theksoi se BDI nuk do të shërbejë si një mjet politik në duart e Hristijan Mickoskit apo kujtdo që, sipas tij, synon t’i shtypë të drejtat e shqiptarëve. Me një retorikë të ashpër, ai tha:

“BDI nuk vjen nga ekranet televizive, por nga lufta dhe rezistenca për barazinë e shqiptarëve. Nëse dikush është mësuar të jetë vasal, ne nuk jemi ata.”

Lideri i BDI-së i drejtoi një ftesë të hapur koalicionit VLEN që të largohen nga institucionet shtetërore, duke shpjeguar se partia e tij nuk mund të përdoret si zëvendësim sa herë që dikush vendos të tërhiqet.

“Ata vetë e zgjedhin të ardhmen e tyre. Le të qëndrojnë aty ku janë,” shtoi Ahmeti.