Tragjedia në Koçan/ Ministri i Shëndetësisë Arben Taravari ka një mesazh për mediat

Të nderuar përfaqësues të mediave,
Në këto kohë të vështira, prioriteti ynë më i lartë është kujdesi për të lënduarit dhe mbështetja e familjeve të tyre. E vlerësojmë thellësisht përkushtimin tuaj për informimin e publikut dhe ju falemnderojmë për solidaritetin dhe përgjegjësinë që keni treguar.
Megjithatë, në frymën e ndjeshmërisë dhe standardeve etike, ju kërkoj që të respektoni privatësinë dhe dinjitetin e viktimave. Publikimi i pamjeve dhe fotove të të lënduarëve në momentet e tyre më të cenueshme mund të shkaktojë dhimbje shtesë, jo vetëm për ta, por edhe për familjet e tyre dhe mund të ndikojë në procesin e rikuperimit të tyre.
Prandaj, bëj një apel të sinqertë për raportim të përgjegjshëm, i cili do të theksojë mbështetjen dhe ndihmën për ata që kanë më shumë nevojë. I besoj profesionalizmit dhe ndjeshmërisë tuaj në raportimin e kësaj tragjedie.
Faleminderit për mirëkuptimin, bashkëpunimin dhe përkushtimin tuaj ndaj asaj që është vërtet e rëndësishme, duke informuar me respekt dhe empati.