Tërmeti në Myanmar, pasoja e parë katastrofike e bllokimit të ndihmave humanitare nga Trump

Tërmeti 7.7 ballë në Myanmar është katastrofa e parë madhore që ndodhi pas shkurtimeve masive që Trump bëri në fondet kundrejt ndihmave financiare.

Ky është tërmeti i parë natyror që ndodh pas mbylljes së agjencisë amerikane të ndihmës ndërkombëtare nga Presidenti Donald Trump, me pasoja që mund të jenë shkatërruese. Pasojat e këtij tërmeti pritet të jenë të rënda ku deri më tani numri I viktimave ka arritur mbi 1640.

Vendimi i Trump për të mbyllur Agjencinë e SHBA-së për Zhvillim Ndërkombëtar (USAID) tashmë është raportuar se ka shkatërruar operacionet e ndihmës amerikane në Myanmar. Ndikimi i saj global është i vështirë për t’u përshkruar. Ndihma amerikane ka siguruar 40% të ndihmës zhvillimore në mbarë botën.

Dje, Trump premtoi ndihmë për Myanmarin pas tërmetit. Në të vërtetë, administrata e tij ka larguar shumicën e personave me përvojë në organizimin e kësaj ndihme dhe ka mbyllur mjetet për ta siguruar atë. Stafi i fundit i USAID u largua ironikisht pikërisht dje, ndërkohë që presidenti po bënte premtime të mëdha për ndihmën.

Departamenti i Shtetit i SHBA ka thënë se ka mbajtur një ekip ekspertësh në vend. Megjithatë, ish-punonjës të USAID thonë se sistemi tani është “në rrënoja” dhe nuk ka mjetet për të zhvilluar operacione kërkim-shpëtimi ose për të transferuar ndihma.

Katastrofa vjen në një moment shumë të keq për Gjeneralin Min Aung Hlaing, i cili mori pushtetin përmes një grushti shteti katër vjet më parë. Diktatura ushtarake e Myanmarit po humb një luftë civile kundër një varg forcash opozitare, duke humbur territore që tani janë të përqendruara kryesisht në qytetet e mëdha të vendit. Disa nga dëmet më të rënda janë shkaktuar në bastionet urbane të regjimit.

Pasojat e katastrofës janë kaq të mëdha sa që Hlaing ka thyer izolimin e vetimponuar të qeverisë së tij për të kërkuar ndihmë nga bota.

Myanmar është një vend thellësisht supersticioz. Gjeneralët që e kanë sunduar që nga fundi i periudhës koloniale kanë konsultuar astrologë dhe përdorin objekte dhe kafshë, përfshirë elefantë të bardhë, për të mbrojtur pushtetin e tyre.

Megjithatë, tërmetet konsiderohen si shenjë e ndryshimeve të mëdha në Myanmar dhe ndonjëherë ‘të rënies së liderëve’. Kjo mund të përshpejtojë rrëzimin e juntës së urryer.

Junta mbetet e fuqishme, e furnizuar nga aleati i saj Kina me armë të avancuara. Ajo ka përdorur avionë luftarakë për të shkaktuar vrasje kundër kundërshtarëve dhe civilëve, ndërsa lufta civile është intensifikuar.

Por, armikut po i shtohet forca gjithashtu, duke improvizuar me dronë dhe taktika të tjera për të ruajtur ritmin kundër një regjimi që ka humbur çdo legjitimitet. Ata do të inkurajohen nga besimi se kjo katastrofë do ta afrojë më shumë ditën e fitores së tyre.