Perinski në Ilinden: Projekte të reja për përmirësimin e jetës së qytetarëve

Në kuadër të vizitave në terren “Ku zemra është në shtëpi”, ministri i Vetëqeverisjes Lokale, Zllatko Perinski, së bashku me kryeministrin, Hristijan Mickoski, vizituan Komunën e Ilindenit. Gjatë vizitës u shënua fillimi i ndërtimit të tre projekteve të rëndësishme infrastrukturore, të cilat do të kenë një ndikim të madh në zhvillimin e komunës. Dy prej tyre janë, ndërtimi i dy rrugëve dhe një urë prej betoni të armuar mbi një kanal kullues, që financohen nga buxheti shtetëror, i miratuar në thirrjen e parë publike për mbështetje financiare të projekteve infrastrukturore.

Projekti i tretë, ndërtimi i një pjese të një rruge të re të planifikuar, e cila financohet nga buxheti komunal.

“Sot, në kuadër të vizitave në terren ‘Ku zemra është në shtëpi’, ndodhemi në Komunën e Ilindenit, në vendbanimin Jaka, ku kanë filluar punimet për tre projekte që përbëjnë një tërësi dhe janë thelbësore për zhvillimin e komunës. Realizimi i tyre do të përmirësojë ndjeshëm jetën e përditshme të banorëve të kësaj lagjeje të re dhe zhvillimin e shpejtë. Kjo është një tjetër dëshmi e përkushtimit tonë për të zbatuar zgjidhje konkrete që krijojnë kushte të qëndrueshme për rritje dhe përparim, me qëllim që të sigurohet një jetë më e mirë për qytetarët”, theksoi ministri Perinski.

Më herët, ministri Perinski dhe zëvendësi i tij, Erdjan Selimi, u takuan me kryetarin e komunës, Aleksandar Gjorgjievski, dhe anëtarët e Këshillit Komunal, ku diskutuan për projektet aktuale dhe sfidat me të cilat përballet komuna, si dhe për përfitimet e planifikuara nga Ligji për Vetëqeverisjen Lokale. Ministri gjithashtu zhvilloi një takim me qytetarë të interesuar, të cilët paraqitën propozime dhe sugjerime për zhvillimin e mëtejshëm të komunës.

Kryeministri Hristijan Mickoski theksoi përkushtimin për ndërtimin dhe zhvillimin e komunave, duke vënë në dukje rëndësinë e krijimit si një parim kyç në veprimin politik.

“Është kënaqësi dhe nder për mua të jem sot në Komunën e Ilindenit. Ne do të vazhdojmë të ndërtojmë edhe më tej, sepse ky është thelbi i funksionimit politik – të ndërtohet dhe jo të shkatërrohet. Kjo është filozofia jonë dhe kështu do të vazhdojmë të veprojmë. Nuk kam çfarë të shtoj më shumë në lidhje me karakteristikat teknike, pasi ato u shpjeguan nga ministri dhe kryetari i komunës. Më mbetet vetëm t’i shpreh falënderimet e mia kryetarit Gjorgjievski për agjendën e tij mjaft ambicioze në Komunën e Ilindenit, këshilltarëve, administratës dhe Ministrisë së Vetëqeverisjes Lokale, e cila ka fasilituar edhe thirrjen e dytë”, tha Mickoski.

Kryetari i Komunës së Ilindenit, Aleksandar Gjorgjievski, njoftoi projekte të rëndësishme infrastrukturore për përmirësimin e lidhjeve rrugore dhe standardit të jetesës së qytetarëve.

“Komuna e Ilindenit ka nisur disa projekte të rëndësishme, duke ndërtuar tre rrugë dhe një urë, me një gjatësi totale prej 1150 metrash. Bëhet fjalë për një investim prej mbi 40 milionë denarësh, nga të cilat pjesa më e madhe e fondeve, mbi 70%, janë siguruar nga Qeveria, ndërsa rreth 30% bashkëfinancohet nga komuna. Vendbanimi Jaka është një lagje e re që po ndërtohet me intensitet dhe planifikojmë të vazhdojmë me të njëjtin ritëm edhe në të ardhmen. Këto rrugë dhe kjo urë do të sigurojnë një hyrje të re në lagje, e cila do të lehtësojë trafikun dhe do të përmirësojë kushtet e jetesës së banorëve jo vetëm këtu, por edhe në të gjithë komunën. Në këtë drejtim, dua të shpreh mirënjohjen time të madhe ndaj Qeverisë për mbështetjen që na jep, veçanërisht Kryeministrit, sepse me thirrjen e mëparshme, përveç këtyre projekteve, po fillojmë edhe ndërtimin e kanalizimit fekal në fshatin Kadino, si pjesë e fazës së dytë. Atje tashmë po zhvillohet faza e parë me fondet e komunës, ndërsa faza e dytë financohet nga Qeveria”, theksoi Gjorgjievski.