Mbyllen markete, barnatore dhe importues për shkak të marxhës deri në 70%. Tetë kompani të sanksionuara për çmime tepër të larta

Tetë kompani, përfshirë tre markete, një farmaci dhe tre nga importuesit më të mëdhenj të frutave dhe perimeve, përballen me mbyllje 15-ditore për shkak të mosrespektimit të masave qeveritare për kufizimin e marzhave. Përveç mbylljes përkohshme, këto kompani do të penalizohen gjithashtu me gjoba.

Siç informoi drejtori i Inspektoratit të Tregut, Vlatko Stojkoski, kontrollet kanë treguar se disa nga këta subjekte kanë realizuar marža deri në 70%, duke i tejkaluar ndjeshëm kufizimet e vendosura.

– Inspektimet kanë zbuluar shkelje në veprimtarinë e tetë subjekteve, ku marzhat arritën deri në 70%. Përveç mbylljes përkohshme, këto subjekte do të sanksionohen gjithashtu me gjoba – tha Stojkoski në një konferencë për shtyp.

Drejtori i Inspektoratit të Tregut, Vlatko Stojkoski, zbuloi se aktualisht po shqyrtohen edhe 30 raste të tjera që lidhen me markete të ndryshme të mëdha, ndërkohë që inspektorët vazhdojnë me kontrolle të pandërprera në terren.

– Inspektorët janë vazhdimisht në terren dhe realizojnë kontrolle pa ndërprerje. Aktualisht, po punojmë mbi 30 raste të tjera që përfshijnë të gjitha marketet e mëdha – theksoi Stojkoski.

Pavarësisht këtyre shkeljeve, Stojkoski vlerësoi se masat qeveritare janë respektuar në pjesën më të madhe.

Nga data 24 shkurt deri më 6 mars, Inspektorati i Tregut ka realizuar gjithsej 365 inspektime në dyqanet me pakicë dhe 64 në ato me shumicë, duke përfshirë mbi 1,000 subjekte tregtare. Gjatë këtyre inspektimeve, janë konstatuar 36 shkelje dhe janë lëshuar gjoba për një shumë totale prej 42,000 euro.