Erdogan për sulmet e Izraelit: Ata që vrasin fëmijë do të mbyten në gjakun e të pafajshmëve (VIDEO)

“Ata që nuk i ndalojnë krimet e luftës dhe gjenocidin e Izraelit do të mbajnë përgjegjësi në histori. Ata që vrasin fëmijë, të guximshëm nga fuqitë mbi të cilat mbështeten, në dashtë Zoti, do të mbyten në gjakun e të pafajshmëve”, tha presidenti turk Recep Tayyip Erdogan, në një deklaratë pas iftari.

“Ata që nuk ndalojnë krimet e luftës dhe gjenocidin e Izraelit, herët a vonë do të mbajnë përgjegjësi në histori”, shtoi ai.

Bëhet e ditur se Erdogan foli në një iftar ku u takua me ish-deputetë në Qendrën e Kongreseve të Partisë së Drejtësisë dhe Zhvillimit, shkruajnë mediat e huaja.

Në fjalimin e tij, Erdogan paraqiti këto pika kryesore në lidhje me sulmet e Izraelit në Gaza:

“Administrata sioniste izraelite vazhdon politikën e saj të masakrës me gjithë pamëshirshmërinë e saj. Në sulmet e fundit, më shumë se pesëqind palestinezë ranë dëshmorë. Ata që heshtin për masakrat e kryera në mënyrë të pamatur dhe ata që nuk parandalojnë krimet kundër njerëzimit, herët a vonë do të mbajnë përgjegjësi si në histori ashtu edhe në ndërgjegjen njerëzore”, tha lideri turk.

“Ata që vrasin fëmijë do të mbyten në gjakun e palestinezëve të pafajshëm. Si Turqi, ne do të vazhdojmë të zëmë vendin tonë në anën e duhur të historisë dhe të mbështesim palestinezët e shtypur”, përfundoi ai.

Ndryshe, Erdogan foli edhe për arrestimin e kryebashkiakut të Stambollit.

Ai tha se partia kryesore e opozitës po kërkonte të mbulonte gabimet e veta dhe të mashtronte njerëzit, në komentet e tij të para për ndalimin e kryebashkiakut.

“Ne nuk kemi kohë për të humbur në debate të kota”, tha Erdogan në një fjalim në Ankara, një ditë pasi kryetari i Stambollit, Ekrem Imamoglu, rivali i tij kryesor politik, u arrestua.