Fenomen misterioz: Lumi Sarandit në Buenos Aires bëhet i kuq si gjaku, nisin hetimet

Lumi i Sarandit në Buenos Aires mori ngjyrë të kuqe si të gjakut të enjten, duke shkaktuar shqetësime te autoritetet dhe banorët.

Ky fenomen është ende i panjohur dhe është duke u hetuar për të përcaktuar shkakun e ndryshimit të ngjyrës në ujë.
Përroi i Sarandit është një degë e Río de la Plata, një grykëderdhje që ndan Argjentinën dhe Uruguain.

Banorët e zonës e panë ngjyrimin e pazakontë të ujit që në mëngjes, duke shkaktuar shqetësim dhe duke nxitur autoritetet lokale të mblidhnin mostra për analizë.

Për momentin, zyrtarët nuk kanë konfirmuar shkakun e ndodhisë.

Disa sugjerime nga mediat lokale flasin për mundësinë që ngjyra e kuqe të ketë ardhur si rezultat i hedhjes së ngjyrës së tekstilit ose mbetjeve kimike nga një depo pranë kanali.

Ministria e Mjedisit ka deklaruar se mostrat janë marrë dhe hetimet po vazhdojnë për të përcaktuar shkakun.

Në mesditë, ngjyra e ujit ka humbur një pjesë të intensitetit të saj, sipas raporteve të agjencisë AFP.

Disa banorë kanë pohuar se ka pasur herë pas here mbetje toksike të hedhura në këtë rrugë ujore, veçanërisht nga fabrikat që përpunojnë lëkurë dhe tekstil në rajon, vetëm disa kilometra larg qendrës së Buenos Aires.

Një banore e quajtur Silvia tha për mediat se përroi ka pasur herë të tjera ngjyra të ndryshme, përfshirë të verdhë dhe të jeshile, ndërsa një tjetër, Maria Ducomls, theksoi se kishte parë ujërat e ngjyrosura edhe në ngjyra të tjera, përfshirë rozë dhe blu, duke ngritur dyshime mbi përmbajtjen e mbetjeve të fabrikuara që hidhen në ujë.