Trump kërcënon me “ferr” nëse nuk zbatohet marrëveshja për pengjet mes Izrailit dhe Hamasit

Presidenti i sapozgjedhur amerikan, Donald Trump, deklaroi të shtunën se do të “shpërthente ferri” nëse nuk zbatohet armëpushimi në Gaza dhe marrëveshja për shkëmbimin e pengjeve dhe të të burgosurve midis Izraelit dhe Hamasit.

I pyetur në një intervistë telefonike për “NBC News” lidhur me mundësinë e suksesit të marrëveshjes, Trump u përgjigj se kjo do të mësohej shumë shpejt.

“Është më mirë që të mbahet,” shtoi ai.

Trump theksoi se i kishte thënë kryeministrit izraelit Benjamin Netanjahu që të vazhdonte “të bënte atë që duhej”.

“Vetëm vazhdoni të bëni atë që duhet të bëni. Kjo duhet të përfundojë. Duam që të përfundojë, por vazhdoni të bëni atë që duhet bërë,” tha Trump në intervistë.

Ai theksoi rëndësinë e “respektit” ndaj Shteteve të Bashkuara në arritjen e marrëveshjes.

“Respekt. ShBA-ja duhet të respektohet përsëri, dhe duhet të respektohet shpejt. Por respekti është fjala kryesore që unë përdor,” tha presidenti i sapozgjedhur i ShBA-së.

Ai paralajmëroi se armëpushimi mund të dështojë nëse ShBA-ja nuk respektohet.

“Nëse na respektojnë, do të mbahet. Nëse nuk na respektojnë, do të shpërthejë ferri,” shtoi ai.

Trump tha se planifikon të takohet me Netanjahun “mjaft shpejt,” megjithëse refuzoi të jepte detaje për bisedimet e ardhshme.

Katar njoftoi të mërkurën një marrëveshje në tre faza për një armëpushim, me qëllim për t’i dhënë fund më shumë se 15 muajve të sulmeve vdekjeprurëse izraelite në Rripin e Gazës.