Qafë Thanë/ Tentoi të kalonte kufirin me një person të fshehur në bagazhin e makinës, arrestohet 25-vjeçari

Policia Kufitare në Qafë Thanë ka arrestuar një 25-vjeçar nga Prrenjasi, pasi tentoi të ndihmonte një 20-vjeçar të kalonte kufirin në mënyrë të paligjshme, duke e fshehur në bagazhin e makinës së tij tip “BMW”.

Gjatë kontrollit të automjetit, në vijën e dytë të pikës kufitare, u zbulua i fshehur shtetasi 20-vjeçar, i cili po tentonte të kalonte kufirin jashtë rregullave. Në përfundim të hetimeve, drejtuesi i automjetit, M. Ç., u arrestua për veprën penale “Ndihma për kalim të paligjshëm të kufirit”, ndërsa 20-vjeçari, A. B., u procedua në gjendje të lirë për “Kalim të paligjshëm të kufirit”.

Policia sekuestroi një automjet dhe dy telefona celularë, ndërsa materialet i kaluan Prokurorisë së Korçës për veprime të mëtejshme.