PROTESTA NË TEL AVIV: Izraelitët kërkojnë lirimin e pengjeve
Mijëra izraelitë dolën në rrugë mbrëmë duke kërkuar që qeveria e kryeministrit Benjamin Netanyahu të bëjë më shumë për të siguruar lirimin e pengjeve të mbajtura nga grupi islamik Hamas në Rripin e Gazës.
Siç raportohet nga Reuters, anëtarët e familjes së pengjeve mbanin fotografi të të dashurve të tyre ende në robëri dhe iu bashkuan turmës protestuese në Tel Aviv.
Një prej tyre ishte Naama Weinberg, kushëriri i së cilës Itai Svirsky u rrëmbye gjatë një sulmi të Hamasit në qytetet izraelite më 7 tetor dhe, sipas zyrtarëve izraelitë, u vra në robëri.
Në fjalën e saj, ajo iu referua një video që Hamasi publikoi dje, duke pretenduar se një tjetër prej të burgosurve izraelitë kishte vdekur.
“Së shpejti edhe ata që arritën të mbijetojnë kaq gjatë nuk do të jenë më në mesin e të gjallëve.” “Ata duhet të shpëtohen tani,” tha Weinberg.
“Është absolutisht e qartë se qeveria izraelite është plotësisht e falimentuar ideologjikisht. Ata nuk e kanë idenë se çfarë po bëjnë. Është e qartë se ata nuk po përpiqen të shpëtojnë asnjë peng apo t’i japin fund luftës. Qeveria drejtohet në fakt nga fondamentalisti më ekstrem, ideologjia e të cilit nuk ka asnjë lidhje me idealet demokratike”.
Ndërsa mbrëmja po kalonte, disa protestues bllokuan autostradën kryesore të qytetit përpara se policia t’i shpërndante me topa uji dhe disa u përleshën drejtpërdrejt me policinë. Të paktën tre persona janë arrestuar.