Trump e mërzit gjyqtarin gjatë dëshmisë: Avokat, kontrollo klientin
Donald Trump po dëshmon nën betim sot gjatë gjyqit në Nju Jork. Në gjykatë nuk ka kamera, por gazetarët raportojnë se çfarë po ndodh në bazë të informacioneve që marrin nga salla e gjyqit.
Trump, kandidati kryesor për nominimin presidencial republikan në vitin 2024, akuzohet së bashku me dy djemtë e tij dhe gati dhjetë bashkëpunëtorë biznesi se kanë fryrë vlerën e aseteve të tij me miliarda dollarë për të siguruar kushte më të favorshme kreditimi dhe sigurimi.
Prokurorja e Përgjithshme Demokratike e Nju Jorkut, Letitia James po kërkon të paktën 250 milionë dollarë gjobë, një urdhër i përhershëm kundër Trump dhe djemve të tij Donald Jr. dhe Eric për të drejtuar një biznes në Nju Jork dhe një ndalim pesë-vjeçar të pasurive të paluajtshme komerciale për Trump dhe kompanitë e tij.
Gjykata tashmë ka vendosur që ish-presidenti amerikan është përgjegjës për mashtrimin dhe tani po shqyrton shumën e kompensimit.
Prona “Shtatë burimet”
Gjatë dëshmisë së Trump, tema ishte vlerësimi i vlerës së pronës “Shtatë burimet”. Ndihmës prokurori i përgjithshëm Kevin Wallace e pyeti Trumpin nëse i kujtohej kur ai uli vlerën e pasurisë në raportin e tij financiar, gjë që ish-presidenti tha se nuk e bëri.
Trump konfirmoi se në një moment kompania Trump Org kreu një raport kredie tatimore për “Shtatë burimet” dhe se avokatja e taksave Sheri Dillon trajtoi rastin. Ai shtoi se mendon se vlera e 291 milionë dollarëve në raportin e vitit 2014 është e lartë.
“Epo, mendova se ishte e lartë. Në kohën kur e kuptova, raporti ishte bërë tashmë,” tha Trump, duke vënë në dukje se ata më vonë ulën vlerën.
Pasuria “Shtatë burimet” ndodhet në Westchester, Nju Jork. Është një nga pronat e identifikuara në padi që Trump thuhet se e ka mbiçmuar.
Gjatë dëshmisë, Donald Trump u mbështet në mikrofon dhe tha se ishte një gjyq shumë i padrejtë: “Ky është një gjyq shumë i padrejtë. Shumë, shumë i padrejtë. Shpresoj se publiku po e shikon.” Pas kësaj, gjykata urdhëroi një pushim prej 15 minutash.
Gjysma e parë e dëshmisë u karakterizua nga kundërshtimet e gjyqtarit Arthur Engoron, sepse gjyqtari po bëhej i paduruar me përgjigjet shumë të gjata dhe disi të paqarta të ish-presidentit amerikan.
“Avokat Kise, a mund ta kontrollosh klientin tënd? Ky nuk është një tubim politik, ky është një sallë gjyqi,” i tha Engoron avokatit të Trump, Chris Kise.
“Përveç që përgjigjet nuk janë të kënaqshme, po përsëriten. Nuk kemi kohë për të humbur. Kemi vetëm një ditë për këtë dëshmi. Kise, ishte një pyetje e thjeshtë po ose jo, dhe morëm një fjalim tjetër. Ju lutem të kontrollojeni. Nëse nuk mundeni, unë do ta bëj”, shtoi ai.
Trump u pyet në gjykatë për përgjegjësinë e tij në përpilimin e deklaratës financiare të vitit 2014, për të cilën ish-presidenti amerikan tha se ishte përgjegjës për dhënien e informacionit. Ai shtoi se firma e tij e kontabilitetit “Mazars” nuk kishte asnjë problem me këtë dhe e dorëzoi raportin.
“Donald J. Trump është përgjegjës për përgatitjen dhe paraqitjen e drejtë të pasqyrave financiare në përputhje me parimet e kontabilitetit të pranuara përgjithësisht në SHBA dhe për hartimin, zbatimin dhe mirëmbajtjen e kontrollit të brendshëm që lidhet me përgatitjen e pasqyrave financiare,” tha një përfaqësues i Prokurorit të Përgjithshëm të Shtetit të Nju Jorkut, raportojnë mediat amerikane.