Izraeli pretendon se ka arrestuar 870 anëtarë të Hamasit në Bregun Perëndimor të okupuar

Ushtria izraelite njoftoi se ka arrestuar 870 anëtarë të Hamasit në Bregun Perëndimor të okupuar që nga 7 tetori, transmeton Anadolu.

Në një deklaratë të ushtrisë thuhet se 28 palestinezë u arrestuan në Bregun Perëndimor të okupuar në orët e fundit, duke përfshirë 11 anëtarë të Hamasit.

Sipas deklaratës, gjithsej 1.350 palestinezë u arrestuan në territorin e pushtuar që nga 7 tetori, duke përfshirë 870 anëtarë të Hamasit.

Tensionet janë përshkallëzuar në të gjithë Bregun Perëndimor të okupuar që nga 7 tetori, kur filluan luftimet në Rripin e Gazës.

Sipas Ministrisë palestineze të Shëndetësisë, të paktën 163 palestinezë janë vrarë dhe 2.250 të tjerë janë plagosur nga të shtënat e ushtrisë izraelite në territorin e pushtuar që nga shpërthimi i konfliktit të Gazës.

Shoqata Palestineze e të Burgosurve vlerëson se të paktën 2.215 palestinezë janë arrestuar në Bregun Perëndimor gjatë muajit të kaluar.

Para konfliktit të Gazës, sipas shifrave palestineze, numri i të burgosurve palestinezë në burgjet izraelite vlerësohej në rreth 5.200.