EULEX-i bastis shtëpinë e ish-pjesëtarit të UÇK-së

Njësitë e Policisë së EULEX-it janë duke e bastisur një shtëpi banimi në Kodër të Trimave në Prishtinë.

Bëhet fjalë për shtëpinë e Behar Berishës, ish-pjesëtar i Ushtrisë Çlirimtare të Kosovës, i cili ka qenë bashkëluftëtar i Sali Mustafës – Calit.

Përndryshe dje me urdhër të Prokurorisë së Dhomave të Specializuara të Kosovës në Hagë, zyrtarë të EULEX-it ia kanë konfiskuar telefonin Arben Mustafës, vëllait të Salih Mustafës – Calit.

Lajmin për Klankosova.tv e ka konfirmuar avokati i Mustafës, Betim Shala, i cili tha se ngjarja ka ndodhur rreth orës 16:00.

“Po është e vërtetë. Telefonin e ka konfiskuar policia e EULEX-it. Kjo është bërë me vendim të gjyqtarit të Gjykatës së Dhomave të Specializuara në Hagë. Ekziston dyshimi i kryerjes së veprës penale ‘pengim i drejtësisë’. Për momentin vetëm ky hap procedural është marrë, pra konfiskimi i telefonit”, tha Shala.

Shala tha se pas ekzaminimit të telefonit të Mustafës atëherë do të vërtetohet se nuk ka asgjë të vërtetë në pretendimet e Prokurorisë./klankosova