Turi i Francës/ Çiklisti australian Hindlej triumfon në malet e Pirenejve

Një etapë spektakolare.

Turi i Francës i dha të apasionuarve të çiklizmit emocione të forta në segmentin e tij të 5-të, një etapë malore prej 163 kilometrash, që solli ndryshime të rëndësishme në renditje.

Fanelën e Verdhë tashmë nuk e ka britaniku Adam Jejts, por Xhej Hindli, që fitoi në ngjitjet e para në malet e Pirenejve. Australiani 27-vjeçar i përshkoi kilometrat më shpejt se të tjerët dhe jo vetëm që u bë fituesi i etapës, edhe edhe i bluzës së udhëheqësit të Turit.

Po ashtu, ndodhi përballja e radhës mes dy favoritëve për fitoren përfundimtare.

Këtë herë ishte danezi Vingegard që u shkëput nga slloveni Pogaçar, duke i marrë 1’04”, ndërsa ish-kampioni kishte marrë 11 sekonda ndaj kampionit në fuqi në etapet e mëparshme. Kjo do të thotë se Vingegard mund të cilësohet favorit për ta mbrojtur titullin e fituar vjet.

Gjithsesi, deri në përfundim duhen edhe 16 etapa, nga të cilat do të ketë edhe 7 ngjitje malore në Pirenej dhe në Alpe, e po ashtu do të jetë gara e kronometrit individual në 18 korrik. Vingegard e Pogaçar duhet të ruhen edhe nga australiani Hindli që jo më kot e mori Fanelën e Verdhë në ngjitjet e Pirenejve.