Rama i dërgon Macronit dhe Scholzit një draft statut për Asociacionin
12:51 – Edi Rama: Serbia s’ka fuqi që t’i prek asnjë fije floku Kosovës
Kryeministri i Shqipërisë, Edi Rama, ka mbajtur sot një konferencë për media ku ngritur shqetësimet e tij lidhur me situatën e krijuar në Kosovës.
Në këtë konferencë, ai ka thënë se Serbia e ka humbur Kosovën përfundimisht në vitin 1999 dhe më nuk e ka asnjë fuqi që t’i prek Kosovës asnjë fije floku, raporton Klan Kosova.
“Nuk ka kërcënim për Kosovën nga viti 1999, ai është vetën më mendjen e politikanëve në Kosovë dhe vetëm një mënyrë për të bërë politikë të brendshme”, ka thënë Rama.
“Serbia e ka humbur Kosovën në vitin 1999 dhe nuk ka asnjë fuqi që t’i prek Kosovës asnjë fije floku. Këtë e di secili që e shikon skenën pa interesat elektorale brenda Serbisë apo Kosovës”.
Ndër të tjera, Rama ka bërë të ditur se i ka dërguar presidentit të Francës, Emmanuel Macron, dhe kancelarit të Gjermanisë, Olaf Scholz, një draft statut për Asociacionin e Komunave me Shumicë Serbe.
“Me Albin Kurtin nuk e kemi diskutuar dokumentin. Nuk është fati i Kurtit sot në lojë, është fati i Republikës së Kosovës si e tërë dhe natyrisht që unë dua vetëm suksesin e Kurtit dhe Qeverisë së Kosovës”, ka theksuar ai.
“Por, nuk mund të rri më duke parë në kushtet kur realisht ajo që shoh duhet ndarë me të gjithë sepse është një kërcënim shumë i madh që nuk i vjen Kosovës nga Serbia, por i vjen nga reduktimi i marrëdhënieve me aleatët në një nivel ku e humbura e madhe është Kosova. Ky është shqetësimi im”, ka thënë Rama.
Më tej, ai ka uruar që dokumenti të cilin ua ka dërguar dy burrështetasve evropianë, thjeshtë të përkthehet në një mundësi për dialogun “pastaj aty e dinë vetë ata se çfarë marrin e çfarë nuk marrin”, siç ka thënë ai.
12:15 – Rama i dërgon Macronit dhe Scholzit një draft statut për Asociacionin
Kryeministri i Shqipërisë, Edi Rama, ka mbajtur sot një konferencë për media, ku ka bërë të ditur se i ka propozuar presidentit të Francës, Emmanuel Macron, dhe kancelarit të Gjermanisë, Olaf Scholz, një draft statut për Asociacionin e Komunave me Shumicë Serbe.
Ai ka uruar që ky material të vlerë për të çuar në një nivel tjetër dialogun dhe për t’i bërë palët që të flasin për gjëra konkrete, njofton Klan Kosova.
“Dje i kam përcjellë presidentit Macron dhe Scholz një draft të Asociacionit për të cilin kam vënë në dijeni edhe Charles Michelin dhe palën amerikane. Është një draft punuar nga ekspertë të nivelit më të lartë amerikanë dhe evropianë prej kohësh”, ka thënë Rama.
Tutje, Rama ka thënë se drafti në fjalë është bërë pikërisht në rast se do të vinte kjo ditë.
“Kjo ditë kur palët dhe në këtë rast, për mua i pakuptueshëm është pozicioni i Kosovës dhe jo i Serbisë. Palët nuk po merren dot vesh se as kush duhet ta shkruajë këtë tekst, e jo më se çfarë do të ketë teksti”.
Sipas tij, me këtë dokument konfidencial nuk pretendohet të jetë gjetur zgjidhja ideale, por është një dokument i nivelit më të lartë që merr në konsideratë se Asociacioni është pjesë e organizimit të jetës në Republikën e Kosovës duke adresuar të gjithë rekomandimet e Gjykatës Kushtetuese të Kosovës.
“Uroj që ky material do të vlejë për të çuar në një nivel tjetër dialogun dhe për t’i bërë palët që të flasin për gjëra konkrete”, ka deklaruar Rama.
12:08 – Edi Rama: Asnjëra palë s’e do Asociacionin
Kryeministri i Shqipërisë, Edi Rama, ka mbajtur sot një konferencë për media në lidhje me situatën në veri të Kosovës, ku ka theksuar se as Kosova dhe as Serbia nuk e do Asociacionin e Komunave me Shumicë Serbe.
Sipas tij, me që Kosova dhe Serbia nuk e duan një gjë të tillë, ato do ta prolongojnë këtë proces duke mbajtur krizën e hapur në veri të Kosovës, njofton Klan Kosova.
“Situata në veriun e Kosovë po merr për fat të keq përmasat e një tragjedie politike për Republikën e Kosovë. Deklaratat e aleatëve tanë lidhur me këtë situatë janë gjithnjë më alarmante dhe sinqerisht është e pakuptueshme arsyeja e ngurrimit të autoriteteve të Kosovës për de-eskalimin e një situatë ku dukshëm çdo ditë, çdo orë, e humbura e madhe është Kosova”, ka thënë Rama.
“Serbia po bën atë që ka bërë edhe herët tjera, ndërsa Kosova po bën diçka që nuk e ka bërë kurrë më parë dhe si kurrë më parë po fajësohet botërisht nga të gjithë aleatët strategjik të kombit shqiptar”, ka shtuar ai.
Tutje, ai ka uruar që Kosova të mos sanksionohet nga komuniteti ndërkombëtar për qëndrimin e saj karshi situatës në veri të Kosovës.
“E kam ditur me kohë që mënyra gordiane e dialogut do të ishte deri në fund Asociacioni dhe bindja ime është se asnjëra nga palët nuk e do Asociacioni dhe do të bëjnë çmos që ta shtyjë atë në pafundësi duke mbajtur të hapur krizën”, ka theksuar Rama.