“Duhet më shumë punë”, Borrell shkruan në rrjete sociale pas përfundimit të takimit

Përfaqësuesi i Lartë i BE-së për dialogun Kosovë-Serbi, Josep Borrell, ka shkruar në Twitter pas përfundimit të takimit në mes të kryeministrit të Kosovës, Albin Kurti dhe presidentit të Serbisë, Aleksandar Vuçiq.

Borrell tregoi se të dyja palët janë pajtuar të vazhdojnë përpara me planin franko-gjerman. Spanjolli tha tutje se sot janë bërë disa përparime, por që duhet ende shumë punë.

“Presidenti serb Aleksandar Vuçiq dhe kryeministri i Kosovës Albin Kurti sot janë pajtuar se nuk nevojiten diskutime të mëtejshme për Propozimin e BE-së – “Marrëveshja për rrugën drejt normalizimit ndërmjet Kosovës dhe Serbisë”, shkroi ai.

“Sot kemi bërë disa përparime, por duhet më shumë punë”, shtoi Borrell.
Diplomati spanjoll poashtu tregoi se takimi tjetër do të jetë për finalizimin e diskutimeve për aneksin e zbatimit dhe se marrëveshja është në të mirë të qytetarëve të të dyja vendeve.

“Marrëveshja është mbi të gjitha për qytetarët e Kosovës dhe Serbisë. Gjatë muajit mars do të thërras një takim tjetër mes dy liderëve me qëllim finalizimin e diskutimeve për aneksin e zbatimit, i cili do të drejtojë fazën e zbatimit të Marrëveshjes.”