Ëndrra e Messit vazhdon, Argjentina kualifikohet në gjysmëfinale të Kupës së Botës

Argjentina është kualifikuar për në gjysmëfinale të Kupës së Botës “Katar 2022”.

Argjentinasit eliminuan Holandën në çerekfinale pas ekzekutimit të penalltive me rezultatin 3:4.

Loja e rregullt prej 90 minutave, si dhe vazhdimet prej gjysmë ore u mbyllën me rezultatin 2:2,

Nahuel Molina (35’) dhe Lionel Messi (73’ – nga penalltia) shënuan për Argjentinën fillimisht, duke krijuar epërsi të dyfishtë.
Por, holandezët nuk u dorëzuan dhe ia dolën të barazonin rezultatin në fundin e ndeshjes.

Ishte Wout Weghorst që shënoi të dy golat për “Tulipanët”, në minutat 83 dhe 90+11.

Vazhdimet vazhduan me të njëjtin rezultat, teksa në penallti më të saktë u treguan të përzgjedhurit e Lionel Scalonit.

Messi, Paredes, Montiel dhe Martinez shënuan nga 11 metërshi, teksa gaboi vetëm Fernandez.

Koopmeiners, Weghorst dhe Luuk de Jong ishin të saktë për Holandën, por gabuan Van Dijk e Berghuis.

Argjentina në gjysmëfinale do të takohet me Kroacinë.