Ministri i Brendshëm, Xhelal Sveçla ka njoftuar se sot së bashku me menaxhmentin e lartë të Policisë së Kosovës vizituan pikat kufitare në Jarinjë dhe Bërnjak, si dhe stacionet e policisë kufitare në Jasenovik dhe Koshtovë.
Përmes një shkrimi në Facebook, Sveçla tha se zyrtarët policorë me përkushtim po vazhdojnë angazhimet e tyre që të ofrojnë rend, siguri dhe mbrojtje për të gjithë qytetarët në tërë territorin e Kosovës.
“Nga kjo vizitë pash motivim të nivelit më të lartë tek zyrtarët policor të cilët në koordinim me të gjitha institucionet e sigurisë, me përkushtim po vazhdojnë angazhimet e tyre të përditshme që të ofrojnë rend, siguri dhe mbrojtje për të gjithë qytetarët e vendit në tërë territorin e Republikës së Kosovës.
Angazhimi i pakursyer institucional dhe siguria vazhdojnë të mbeten prioritete tona duke garantuar kështu sundim të ligjit dhe paqe të qëndrueshme në vend”.