Arrestohen katër tifozë të Juventusit pasi u panë duke bërë gjeste raciste dhe përshëndetje naziste në ndeshjen ndaj PSG-së

Disa tifozë të Juventusit u kapën në kamera duke bërë gjeste raciste gjatë ndeshjes kundër Paris Saint-Germainit, dhe UEFA tani ka hapur një hetim për këtë çështje.

Tifozët e skuadrës italiane ishin të pranishëm në “Parc des Princes”, atje ku skuadra e tyre pësoi humbje nga PSG-ja me rezultatin 2:1, transmeton Gazeta Express.

Mirëpo, tifozët italianë u panë duke bërë gjeste raciste dhe përshëndetje naziste, për çka edhe policia franceze ka nisur hetimet – përveç UEFA-s.

Një tifoz u kap në kamera duke bërë gjeste majmuni drejt një tifozi me ngjyrë të PSG-së, derisa të tjerët bënin thirrje raciste. Videon mund ta shikoni duke klikuar KËTU.

Katër tifozë raportohet se janë arrestuar nga policia në Paris, derisa ende nuk dihet se çfarë masash do të merren ndaj tyre.

Ndërkaq, UEFA bëri të ditur se një inspektor i etikës dhe disiplinës është caktuar për të kryer një hetim disiplinor në lidhje me akuzat për sjellje diskriminuese nga tifozët e Juventusit.

Kësisoj, “Zonja e Vjetër” mund ta pësoj nga UEFA pas kësaj ngjarjeje, pasi sipas rregullores, klubi është përgjegjës për sjelljet e tifozëve në stadium.