Vuçiç: Serbët janë në situatë të vështirë, por do të bëj më të mirën për ta ruajtur paqen

Presidenti i Serbisë, Aleksander Vuciç, ka thënë se s’ka marrë ftesë nga Brukseli për ndonjë takim të mundshëm me kryeministrin e Republikës së Kosovës, Albin Kurti, edhe pse ishte përmendur 19 korriku si datë e mundshme, shkruan Nova.rs, transmeton Express.

“Askush s’më ka thirrur. Ata po provojnë diçka, por nuk e di se çfarë po përpiqen”, ka thënë Vuçiq.

Tutje shefi i shtetit serb ka thënë se “Serbia do t’i përgjigjet dialogut”, por që sipas tij “s’ka shumë kuptim”, meqë “ata po përgatiten për aksion kundër serbëve”.

Më tej ai ka folur edhe për një situatë të vështirë të serbëve, ndërsa ka shtuar se “do të bëj gjithçka për ta ruajtur paqen”.

“Për fat të keq, mendoj se disponimi në mesin e serbëve është shumë i vështirë dhe shumë i keq. Kam frikë, por do të bëj më të mirën dhe do të bëjmë gjithçka që mundemi për të ruajtur paqen” ka theksuar tutje Vuçiç.