Ukraina dhe Moldavia bëhen edhe zyrtarisht kandidat për anëtarësim në Bashkimin Evropian

Ukraina dhe Moldavia janë pranuar si kandidate për t’u bashkuar me Bashkimin Evropian të enjten, një lëvizje që do të rrisë moralin e vendit pas betejave të shumta me trupat ruse.

Kjo është bërë e ditur pasi udhëheqësit e Bashkimit Evropian janë mbledhur sot në Bruksel teksa kanë diskutuar rreth kandidaturës së Ukrainës.

Një hap i tillë vjen pas atij kur Parlamenti Evropian ka miratuar një rezolutë me 529 vota për, 45 kundër që u bën thirrje liderëve të Bashkimit Evropian që të miratojnë statusin e Ukrainës si një vend kandidat në BE “pa vonesë”.

“Sapo i është dhënë statusi i kandidatit për anëtarësim në BE për Ukrainën dhe Moldavinë. Një moment historik”, ka shkruar në Twitter, Charles Michel, presidenti i Këshillit të Evropës.

Ukraina aplikoi disa ditë pas fillimit të agresionit rus në shkurt dhe që atëherë procesi ka ecur me një shpejtësi rekord.