Rrahje masive në Kaçanik, arrestohen 7 persona

Shtatë persona janë arrestuar në Kaçanik, pas një përleshjeje që kishte ndodhur në rrugën “Ismail Raka”. Policia e Kosovës ka njoftuar përmes komunikatës se tre persona kishin kërkuar ndihmë mjekësore në Qendrën Emergjente të Kaçanikut për shkak të lëndimeve trupore që pësuan nga përleshja.

“Më datë 29.11.2022 rreth orës 12:30 policia e stacionit në Kaçanik ka pranuar një informacion se në Qendrën Emergjente në Kaçanik tre persona kishin kërkuar ndihmë mjekësore, për shkak të lëndimeve trupore që kishin pësuar nga një përleshje në rrugën Ismail Raka në Kaçanik. Policët e rendit e më pas edhe hetuesit policor menjëherë i kanë marrë veprimet e nevojshme, kanë dalë në vendin e ngjarjes dhe nën autorizim të prokurorit kujdestar nga Prokuroria Themelore në Ferizaj i kanë nisur hetimet”, ka thënë policia.

Njëri prej tyre ka pësuar lëndime me thikë, i cili më pas është dërguar në Qendrën Klinike Universitare të Kosovës.

“Nga informatat e para është mësuar se pas një përleshje, tre persona L.Q ( M/K) i moshës 19 vjeçare, M.B ( M/K) i moshës 37 kishin pësuar lëndime të lehta trupore, ndërsa SH.B ( M/K) rreth 20 vjeçar kishte pësuar lëndime të rënda trupore nga një mjet i mprehtë (thikë), nga persona të cilët ishin larguar nga vendi i ngjarjes me një automjet Golf me targa vendore. I lënduari SH.B për tretman të mëtutjeshëm mjekësor është dërguar në Qendrën Klinike Universitare në Prishtinë”.

Po ashtu, bëhet e ditur se policia në Kaçanik ka arritur që të arrestojë 7 persona, të cilët i ka shoqëruar në stacionin e policisë.

Pas intervistimit nga policët hetues, me vendim të prokurorit të rastit, i dyshuari A.P (M/K) i moshës 15 vjeçar është ndaluar në mbajtje për 24 orë, ndërsa L.B ( M/K) i moshës 20 vjeçar , A.L ( M/K) i moshës 22 vjeçar dhe A.B ( M/K) i moshës 42 vjeçar janë ndaluar në mbajtje për 48 orë. Në procedurë të rregullut hetimore janë liruar N.TH ( M/K) i moshës 16 vjeçar, D.T (M/K) i moshës 15 vjeçar dhe V.B ( M/K) i moshës 17 vjeçar.